Mga Obserbasyon Sulod Sa Jeep

Halos kada adlaw gasakay ako sa jeep. Ug dili kalikayan naay mga butang nga akong mabantayan nga kasagara mahitabo sulod sa jeep.

• Kung gwapa ang musakay unya seksi pa gyud, ang ubang kundoktor tsansing kaayo, "Palihog ko'g sibog sa unahan, sa wala, sa tuo..." Dayon hikap sa likod sa babaeng seksi. Ang uban modalikyat pa gyud ug siko sa lubot.
• Kung naay gasunod nga karibal sa byahe, (sa among lugar gitawag kini ug, dumbol). Moingon dayon ang kundoktor o drayber, "Witik-witik lang ta gamay kay naay bundol". O kon dili, " Hawid lang sa tubo mother..." Intawon ang pasahero labi na ug tigulang, kapuliki intawon ug panghawid para dili maligid, kay molarga naman ang jeep bisag wala pa ka lingkod ug ayo ang pasahero.
• Naay ubang jeep karon, (uso kunuhay labi na diri sa among syudad) nga taas kaayo ang step board, mag lisod lagi ka ug saka. Labi na kung maka mini skirt ang babae, aw sure na, kita gyud ang mga kita. Pagtikang pa lang daan, makita na imong pundeyo sa drayber, pag saka nimo (syempre mo duko man), kita pud sa kundoktor imong hita.
• Pag saka sa babae nga gwapa o seksi (labi na gyud ug estudyanteng gwapa ug seksi), labi na kung sya ra isa, patungaan dayon sa duha ka laki nga kauban ra gud silang duha. Ang tuyo lang nga matunga ang babae, dayon mag-istorya dayon ang duha ka lalaki, syempre unsay may bation sa babae?
• Naay ubang pasahero nga mga amang, (purya saway lang pud), manlibak (dili pud tanan). Usahay makasabot na lang ka nga nang libak sila sa imo kay mag sige ug tan aw sa imo dayon katawa. Beh, unsa may gipasabot ana, di, nanglibak!
• Naay ubang pasahero nga kusog kaayo'g tingog kung naay kaistorya sa cellphone. Halos tanan pasahero maminaw nalang unsay giistoryahan nila. Aw, labi nag away ang topic, pag ka joker paminawon.
• Naay magkaon sulod sa jeep: Sus, labi na ug mangga ang gikaon, mag laway na lang ko.
• Naa poy uban nga matulog sulod sa jeep: Pagka purwesyo gayud kay sa imo man mag sandig-sandig, gatulo pa gyud ang laway, plus hagok pa gyud. Kalami ba gyud ituklod. Akong style kung maka abay kog matulog, purmero, magpasandig ko, pag break sa jeep, molikay dayon ko, da lagi! Tuarok ka lagi! Nahuwasan sa kaduka!
  
• Kung naay sounds (music) sulod sa jeep, naa poy uban nga mag pa arong-ingnon nga kabalo sa lyrics sa kanta. Pero kung mismo ikaw nakabalo sa lyrics sa kanta, mabantayan nimo nga lahi ra man ang buka sa baba. Kinapayas lang gyud! Naay mga bugoy nga drayber nga kaliton lang ug palong ang sounds, motibaw lagi ang tingog sa gakanta. Uban pasayro moiingon pud, "Palunga na lang ng sounds manong, kay naay mokanta..."
• Kung tambok kaayo ang musakay, ang ubang kundoktor moingon dayon, "Palihog sibugan nato balig duha..." Daghan na nakakitag away ani sa amoa.
• Naay ubang babae o lalaki taas ug buhok, way mga buot, kabalo sila nga hangin kaayo, dili nila hawiran ilang buhok o bugkoson ba kaha. Ikaw sad nga naa sa ilang likod, sige tawon kalaparuhan sa buhok, usahay musoksok sa imong mata, ilong, dalunggan, ug baba. Kung ako maka abay kog ingon ana, birahon nako dala ingon, "Sorry". Da lagi, hawiran na lagi niya.
• Porbida sad ning makasakay tag gwapa o gwapo unya naka shades naglingkod atbang nimo, dili ta katan aw ug ayo kay basin masakpan ta nga nag tan aw sa ila, no?
• Ngano man ning uban pasahero, dako kaayo ug bag, ang cellphone bit-biton ug hawid-hawiran man gyud? Labi nag klaro kaayo nga bag-o pa ug latest model pa gyud. Pagka snatch, mirisi!
• Mag uyab: Sobra ka sweet ang uban ala, "Put your head on my shoulder", tulog-tulog kunohay. Ang uban pud bisag huot na kaayo sa jeep magpa uraray, sandig-sandig, ang pasahero sa likod nabug atan na ug ayo.
• Baho'g ilok: Usa ni sa dili nako ma agwanta monaug gyud ko kay mara ko'g makuyapan sa baho sa ilok. Bisag open air tuod, pero ang baho naa ra gatuyok-tuyok sa jeep. Nganong dili man sila maka baho sa ilang ilok nga duol ra man unta sa ilang ilong.
  
• Paras nga drayber: Naay ubang drabyer nga way pakialam kung nanga mumu na iyang mga pasahero. Kusog magpadagan, pataka lang ug singit sa traffic, mokalit lang ug break. Mang hawoy lagi imong bukton ug hinawid kay kung dili pud ka manghawid, lagpot ka.
• Plitehan: Labi na karon kay nag increase na ang plitehan, sige lang ko kakita nga ang pasahero ug ang kundoktor o drayber mag away/mag lalis sulod sa jeep. Naay uban bisag kabalo na sila pila ang plite mag pa dingol2x pa gyud may pag moingon nga, "Wa na gyud ko'y lain kwarta." Naa pud uban kundoktor, mag buot pilay plite dili musonod sa taripa. Mao nang gubot permi.

Ug daghan pa kaayo, basin naa mo'y ikadugang, click lang ang post a comment o comment sa taas ani nga post. Salamat sa pagbasa.

Technorati Tags: obserbasyon, sulod sa jeep, sakay, pasahero, kasinatian